Garaşsyz, hemişelik Bitarap Türkmenistan döwletimizde milli ykdysadyýetiň ähli ugurlarynyň sanlylaşdyrylmagy barha işjeň häsiýete, anyk ugurlara we güýçli depginlere eýe bolýar. Çünki sanly tehnologiýalar durmuşymyzyň bütin gurşawyna ornaşyp, olaryň önümçilik, bilim, saglygy goraýyş işine, hyzmatlar ulgamyna we beýleki ugurlara ornaşdyrylmagy iş netijeliliginiň ýokarlanmagyny, bu ugurda zerur wagtyň azalmagyny şertlendirýär. Meýilleşdirilýän işleriň gysga wagtda has kämil ýerine ýetirilmegi, hyzmatlaryň geriminiň giňemegi, ýagny sanly ykdysadyýete geçilmegi raýatlarymyzyň ýaşaýyş- durmuş derejesiniň mundan beýläk-de gowulanmagyna öz oňyn täsirini ýetirýär.
Mälim bolşy ýaly, «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» we «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynda» milli ykdysadyýetimizi dünýä tejribesine laýyklykda sanlylaşdyrmak boýunça öňde durýan möhüm wezipeler kesgitlenilýär. Şunda hususy ulgama sanly ulgamlary, ýokary tehnologiýalary ornaşdyrmaga hem uly ähmiýet berlip, bu ugurda Türkmenistanyň Senagatçylar we telekeçiler birleşmesiniň agzalary tutanýerli işleri alyp barýarlar, oňyn önümçilik netijelerini gazanmagy başarýarlar.
Daşary döwletleriň kämil tehnologiýalary bilen doly enjamlaşdyrylan hususy önümçilik kärhanalarynyň sany barha artyp, olar ilatymyzyň iş bilen üpjünçiligine we iş şertleriniň kämilleşmegine oňyn täsir edýär. Innowasiýalara daýanýan senagat, azyk önümçiligi kärhanalarynda, ýyladyşhana toplumlarynda işler döwrüň talaplaryna laýyklykda guralyp, önümçilik depginleri artdyrylýar. Şeýle-de öndürilýän önümleriň hil taýdan dünýä ölçeglerine laýyk gelmegi gazanylýar. Şoňa görä-de, ýurdumyzda telekeçiler tarapyndan öndürilýän dürli görnüşli önümler içerki sarp edijilere ýetirilmek bilen birlikde, daşary döwletlere hem uly möçberlerde ugradylýar. Diýmek, önümçilik kärhanalaryna sanly ulgamyň gazananlarynyň we innowasiýalaryň ornaşdyrylmagy hormatly Prezidentimiziň daşary döwletlerden getirilýän harytlaryň ornuny tutýan önümleriň öndüriliş derejesini artdyrmak, olaryň eksport kuwwatyny ýokarlandyrmak babatda öňde goýýan wezipelerini üstünlikli çözmekde esasy açar bolup durýar. Muňa «Türkmenistanda öndürilen» belgili harytlara dünýä bazarynda islegiň we hyrydarlygyň diýseň uly bolmagy, halkara sergilerde ýerli önümlerimiziň hemişe-de ýokary bahalara mynasyp bolmagy aýdyň şaýatlyk edýär.
Hususy işewürlige sanly tehnologiýalaryň ornaşdyrylmagy netijesinde, Berkarar döwletiň täze eýýamynyň Galkynyşy döwründe hyzmatlar ulgamy hem ösüş ýoluna gadam basdy. Takyk, çuňňur oýlanyşykly we ylmy esasda guralýan elektron söwda, eltip bermek ýaly döwrebap hyzmat görnüşleri giň gerime eýe bolýar. Ýurdumyzyň telekeçileri tarapyndan söwda nokatlarynda we dükanlarynda ýörite platformalaryň döredilip, olar arkaly söwdany elektron görnüşde amala aşyrmaga mümkinçiligiň bolmagy, saýlanan harydy öýe eltip bermek hyzmatynyň ýola goýulmagy bazar ykdysadyýeti şertlerinde barha işjeňleşýän durmuşymyzda möhüm orna eýe bolýar. Onlaýn söwda dükanlary hem öňdebaryjy tehnologiýalaryň günsaýyn kämilleşýän döwründe uly meşhurlyga eýe bolup, hyzmatlar ulgamynyň okgunly ösüşine mynasyp goşant goşýar. Çünki onlaýn söwda dükanlary üçin döredilýän platformalarda dürli görnüşli önümler, birinjiden, azyk önümleri, hojalyk harytlary ýaly bölümlere bölünip ýerleşdirilse, ikinjiden, gereklenýän önüme degişli maglumatlaryň we olaryň suratlarynyň goýulmagy saýlama mümkinçiligini gysga wagtda ýerine ýetirmäge kömek edýär.
Görnüşi ýaly, sanly ulgama geçilmegi milli ykdysadyýetimiziň beýleki ugurlarynda bolşy ýaly, hususy pudak üçin hem oňaýly mümkinçilikleri döredip, döwlet Baştutanymyz bu ulgamy goldamaga aýratyn üns berýär. Ösen tehnologiýalaryň ornaşdyrylmagy, iň täze enjamlaryň we programma üpjünçiliginiň herekete girizilmegi, maglumat serişdeleriniň netijeli ulanylmagy bilen birlikde, ulgamdaky sanly özgertmeler dolandyryş çemeleşmelerinde hem düýpli özgerişleri göz öňünde tutýar. Şoňa görä-de, ata Watanymyzda milli programma önümlerini döretmekde we ýörite enjamlary öndürmekde ýöriteleşen kiçi hem-de orta telekeçiligi goldamak boýunça anyk işler durmuşa geçirilýär. Munuň özi kärhanalary ösdürmegiň innowasion usullaryna giň ýol açýar. Şol bir wagtda, dünýäniň islendik sebitindäki işewür hyzmatdaşlar bilen gatnaşyklary ösdürmek, maýa goýum işjeňligini artdyrmak üçin amatly şertleri döredýär.
Bir söz bilen aýdanyňda, milli ykdysadyýetimiziň sanlylaşdyrylmagy, oňa innowasion gazanylanlaryň işjeň ornaşdyrylmagy durnukly ösüşi üpjün etmegiň, halkymyzyň ýaşaýyş- durmuş şertlerini ýokarlandyrmagyň möhüm şertidir. Goý, eziz Watanymyzy ösüşleriň röwşen ýoly bilen öňe alyp barýan Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak, alyp barýan döwletli tutumlary elmydama rowaç bolsun!
Annagül Balkanaowa
Balkan welaýat ýörite sungat mekdebiniň mugallymy.