«Halkara Parahatçylyk we ynanyşmak» ýylynda Hormatly Prezidentimiziň parasatly ýolbaşçylygynda türkmen halkynyň gadymy baýramy bolan Nowruz güni mynasybetli dabaralar ýurdumyzda uly şowhun-şatlyk bilen bellendi. ÝUNESKO-nyň «Adamzadyň maddy däl medeni mirasynyň görnükli nusgalarynyň sanawyna» girizilen Nowruz baýramy welaýatymyzyň Magtymguly etrabynyň gözel jülgelerinde özboluşly öwüşgin bilen toý lybasyna beslendi. Guralan ak öýler, olaryň ýanyndaky tapçanlar, hiňňildikler, bularyň ählisi türkmen obasyndaky toý pursatlaryny janlandyrdy. Dutarçylar we bagşylar toparlarynyň ýerine ýetiren aýdymdyr sazlary, läle kakýan gyzlaryň owazy alyslara ýaňlandy. Merkezi sahnada mekdebimizň aýdymçy-bagşylarynyň, tans toparynyň gatnaşmagynda taýýarlanan baýramçylyk konsertleri geçirildi.
